Black Friday

Oot behind a lorry,
Peyin nae heed,
Ablow a double decker,
A poor wean deid.

Perra worn sannies,
Wee durrty knees,
Heh, errapolis,
Stand back please!

Lookit the conductriss,
Face as white as chalk,
Heh, see the driver but,
Canny even talk.

Anyone a witness?
Naw, we never saw,
Glad ah'm no' the polis,
Goin tae tell his maw.

Weemin windae-hingin,
Herts in their mooth,
It's no' oor close, Lizzie,
Oh Gawdstrewth!

Screams on the landin',
Two closes doon,
It's no wee Hughie!
Poor Nellie Broon.

Phone up the shipyard,
Oh, whit a shame,
Yes, we'll inform him,
Please repeat the name.

See Big Hughie,
Jokin' wi' the squad,
Better knock aff, Heug,
Oh dear God.

Whit - no' his lauddie?
Aw, bloody hell!
D'ye see Hughie's face but,
He's just a boy himsel'.

Jimmy Copeland

This page last modified on Monday, March 10, 2003

© Carol McG 2000-2007 all rights reserved, all trademarks hereby acknowledged. The photographs in this site have not to be shared or otherwise used without permission!
Please do not submitt them to any other site for display